ദീപാവലി ആഘോഷമാക്കാൻ പ്രവാസി ലോകം; യുഎഇയിൽ വൻ ആഘോഷ പരിപാടികൾ

ദക്ഷിണേഷ്യയിലെ ഏറ്റവും വലിയ ആഘോഷങ്ങളിലൊന്നായ ദീപാവലിയെ വരവേൽക്കാൻ ആഗോളതലത്തിൽ ഒരുക്കങ്ങൾ പൂർത്തിയായി. തിന്മയ്ക്കുമേൽ നന്മയുടെയും ഇരുളിനുമേൽ വെളിച്ചത്തിന്റെയും വിജയത്തെ പ്രതീകവത്കരിക്കുന്ന ഈ ദീപോത്സവം സാധാരണയായി ശരത്കാലത്തിന്റെ തുടക്കത്തിലാണ് ആഘോഷിക്കുന്നത്. ഹിന്ദു ചന്ദ്രമാസ കലണ്ടറിലെ ഏറ്റവും ഇരുണ്ട രാത്രിയായ അമാവാസി ദിനത്തിലാണ് പ്രധാന ദീപാവലി വരുന്നത്.

ഈ വർഷത്തെ ആഘോഷങ്ങൾ നവംബർ ആറിന് 'ധൻതേരാസ്' ദിനത്തോടെ ആരംഭിച്ചു. നവംബർ എട്ടിനാണ് പ്രധാന ദീപാവലി ആഘോഷങ്ങൾ. സാമ്പത്തിക ഐശ്വര്യത്തിന്റെ ദേവിയായ ലക്ഷ്മി ദേവിയെ സ്വാഗതം ചെയ്യുന്നതിനായി വീടുകളിൽ ദീപങ്ങൾ തെളിയിക്കുന്നതാണ് പ്രധാന ആചാരം. ഇതുകൂടാതെ, രാവണനെ വധിച്ച് സീതാദേവിയോടൊപ്പം ശ്രീരാമൻ അയോധ്യയിലേക്ക് തിരിച്ചെത്തിയതിന്റെ സന്തോഷസൂചകമായും ദീപാവലി ആഘോഷിക്കപ്പെടുന്നു.

അഞ്ചുനാൾ നീളുന്ന ആഘോഷങ്ങൾ

ഹിന്ദു വിശ്വാസികൾക്ക് പുറമെ ജൈന, സിഖ്, ബുദ്ധ മതവിഭാഗങ്ങളിൽ പെട്ടവരും ഈ ദിനം പ്രത്യാശയുടെയും കൂട്ടായ്മയുടെയും ഉത്സവമായി കൊണ്ടാടുന്നു.

ഒന്നാം ദിവസം (ധൻതേരാസ്): വീടുകളും തൊഴിലിടങ്ങളും വൃത്തിയാക്കി പുതിയ തുടക്കങ്ങൾ കുറിക്കുന്നു. മൺവിളക്കുകൾ (ദിയകൾ) തെളിയിച്ച് തുടങ്ങുന്ന ഈ ദിനത്തിൽ സ്വർണ്ണം, വെള്ളി, വാഹനം, ഇലക്ട്രോണിക് ഉപകരണങ്ങൾ എന്നിവ വാങ്ങുന്നത് ശുഭകരമായി കരുതപ്പെടുന്നു.

രണ്ടാം ദിവസം (ചോട്ടി ദീപാവലി): വീടുകളിൽ പലഹാരങ്ങൾ ഉണ്ടാക്കുകയും ബന്ധുക്കൾക്കും സുഹൃത്തുക്കൾക്കും മധുരവും സമ്മാനങ്ങളും നൽകുകയും ചെയ്യുന്നു.

മൂന്നാം ദിവസം (പ്രധാന ദീപാവലി): പുതുവസ്ത്രങ്ങൾ അണിഞ്ഞും പ്രാർത്ഥനകൾ നടത്തിയും ആഘോഷിക്കുന്നു. പൂക്കളോ വർണ്ണപ്പൊടികളോ ഉപയോഗിച്ച് വീട്ടുപടിക്കൽ 'രംഗോലി' തീർക്കുന്നതും പതിവാണ്.

നാലാം ദിവസം: വിളവെടുപ്പ് കാലത്തിന്റെ അവസാനത്തോടനുബന്ധിച്ചുള്ള പരമ്പരാഗത ആചാരങ്ങൾ നടക്കുന്നു.

അഞ്ചാം ദിവസം (ഭായ് ദൂജ്): സഹോദരീ-സഹോദരബന്ധത്തിന്റെ പവിത്രത ആഘോഷിക്കുന്ന ദിനമാണിത്. സഹോദരിമാർ സഹോദരന്മാർക്ക് മധുരം നൽകുകയും ഉപഹാരങ്ങൾ സ്വീകരിക്കുകയും ചെയ്യുന്നു.

വ്യാപാര മേഖലയും പ്രതിസന്ധികളും

സാമ്പത്തിക രംഗത്ത് ദീപാവലി വലിയ മാറ്റങ്ങൾ സൃഷ്ടിക്കാറുണ്ട്. ജീവനക്കാർക്ക് ബോണസുകളും സമ്മാനങ്ങളും ലഭിക്കുന്ന സമയമാണിത്. എന്നിരുന്നാലും, അന്താരാഷ്ട്ര തലത്തിലുണ്ടായ യുദ്ധ പശ്ചാത്തലവും വർദ്ധിച്ചുവരുന്ന ജീവിതച്ചെലവും ഇത്തവണ സ്വർണ്ണ വിപണിയെ ബാധിച്ചിട്ടുണ്ട്. വേൾഡ് ഗോൾഡ് കൗൺസിലിന്റെ കണക്കനുസരിച്ച് ഇത്തവണ സ്വർണ്ണത്തിനായുള്ള ആവശ്യകതയിൽ കാര്യമായ കുറവുണ്ടായിട്ടുണ്ട്.

യുഎഇയിലെ വിപുലമായ ആഘോഷങ്ങൾ

ഇന്ത്യൻ പ്രവാസികൾ ഏറെയുള്ള യുഎഇയിൽ അത്യാകർഷകമായ ആഘോഷ പരിപാടികളാണ് ആസൂത്രണം ചെയ്തിരിക്കുന്നത്. ദുബായ്, അബുദാബി തുടങ്ങിയ എമിറേറ്റുകളിൽ ഷോപ്പിംഗ് മാളുകളും വിനോദ കേന്ദ്രങ്ങളും കേന്ദ്രീകരിച്ച് പ്രത്യേക ഓഫറുകളും കലാപരിപാടികളും നടക്കും.

ഗ്ലോബൽ വില്ലേജ് (ദുബായ്): നവംബർ ആറ് മുതൽ 10 വരെ സാംസ്കാരിക പരിപാടികൾ, 600 ഡ്രോണുകൾ അണിനിരക്കുന്ന ഡ്രോൺ ഷോ (നവംബർ എട്ടിന്), ദക്ഷിണേഷ്യൻ സംഗീത പരിപാടികൾ, ഭക്ഷ്യമേളകൾ എന്നിവ ഒരുക്കിയിട്ടുണ്ട്.

ബാപ്സ് ഹിന്ദു മന്ദിർ (അബുദാബി): നവംബർ ആറ് മുതൽ 10 വരെ പ്രത്യേക പൂജകൾ, സാംസ്കാരിക പരിപാടികൾ, 'മഹാ അന്നകൂട് ദർശനം' എന്നിവ നടക്കും. തിങ്കളാഴ്ച (നവംബർ ഒമ്പത്) ക്ഷേത്രത്തിൽ പ്രത്യേക പ്രവേശനം അനുവദിക്കും.

അൽ സീഫ് (ദുബായ്): 'നൂർ: ഫെസ്റ്റിവൽ ഓഫ് ലൈറ്റ്‌സ്' എന്ന പേരിൽ നവംബർ ഏഴ്, എട്ട് തീയതികളിൽ തത്സമയ സംഗീതം, ബോളിവുഡ് നൃത്തം, കളിപ്പാവകളുടെ ഘോഷയാത്ര എന്നിവ നടക്കും.

ദുബായ് പാര്‍ക്ക്സ് ആന്റ് റിസോർട്ട്സ്: നവംബർ ആറ് മുതൽ എട്ട് വരെ 'ദീപാവലി ധമാക്ക' ലൈവ് മ്യൂസിക്കും ഇൻഡ്യൻ സ്ട്രീറ്റ് ഫുഡ് മേളയും ഒരുക്കിയിട്ടുണ്ട്.

സിറ്റി സെന്റർ ദെയ്റ: ബോളിവുഡ് താരം തമന്ന ഭാട്ടിയ നവംബർ ആറിന് ആരാധകരെ കാണാനെത്തും.

റസ്റ്റോറന്റുകളും ഹോട്ടലുകളും: ഗിംഖാന ദുബായ്, ആവതാര, നമാക് അബുദാബി തുടങ്ങി പ്രമുഖ റെസ്റ്റോറന്റുകളിൽ പ്രത്യേക ഫെസ്റ്റീവ് മെനുവും ഡിന്നർ ബഫെകളും ലഭ്യമാക്കിയിട്ടുണ്ട്.

Content Highlights: UAE gears up for Diwali 2026 with cultural programmes, temple celebrations, music, dance and family activities across Dubai and Abu Dhabi